بره‌یه* چاتمامیش یولو ایتیردین

اووو تانیاسان ایزیندن گرك

كؤلگه‌نین آلتیندا دولاناق دئدین

ایگیدین كؤلگه‌سی اؤزوندن گرك

دانیشدین همشه اؤزگه آدیندان

اؤز آدین اؤز سؤزون چیخدی یادیندان

بسدی یارالاما قول قانادیندان

قوشو دا ویراسان گؤزوندن گرك

دئدین گلجك‌له یاشاییرام من

گؤرمه‌دیم هله كی سن یول اوسته‌سن

اگر گلجگه اوچماق ایسته‌سن

مؤحكم یاپیشاسان بو گوندن گرك

______

بره: 

گذرگاه. معبر. كمین. كمینگاه. راه فرار. راه گریز. مرز راه بین قطعات جالیز. جوی باریك برای آبیاری كشتزارها. راه آب. 

قوشوق: بختیار واهابزاده، آخی دونیا فیرلانیر، نشر پینار

جادا گئدیر، من گئدیرم، چای گئدیر

اورگیم توتقون‌دو، گؤرگیم* گئدیر

جوتونو ایتیرمیش سونادان سوروش

سن‌دن آیری دوشمك منه نه ائدیر

نا محرم اللردن سنی آلینجا

قوللاریمی سنین‌ بوینان سالینجا

كؤلگه كیمی تورپاقدان سورونوركن

هارا گئتسه‌ن، گله‌جگم دالینجا

قیرمیز آلما، چولاق اله یاراشماز

ساری یارپاق قیرمیز گوله یاراشماز

من‌نن دانیش آمما عیتابینان یوخ

شیرین دوداق آجی دیله یاراشماز

ناغیل‌لاردا، هردن بیر توز قوپاردی

بیرسی ایتیره‌ردی، بیرسی تاپاردی

ناغیلیمدا، یوخومدا، بیر توز قوپدی

بیر دوی* گلدی سنی گؤتدی آپاردی

****

حسین منزوی

گؤرك görək : ظاهر

دوی düy : كیتاب‌دا بئله یازیلمیشدی آنلامین تاپانمادیم یانی نمنه. 

یئنه بیر قملی قزل یازماغی باشلانمادادیر گل

یئنه ظولمون اوتو هر بیر یئره داشلانمادادیر گل

یئنه هیجران یئلی عئشقین یوواسین ییخدی داغیتدی

یئنه عاشیقلریوین گؤزلری یاشلانمادادیر گل

داها شنلیك سسی گلمیر ائویمین هئچ بوجاغیندان

یئنه دوستلوق یوواسی یانماغا باشلانمادادیر گل

داها عاشیق‌لیگی بولبول گوله معنا ائلییه‌نمیر

یئنه بیرلیك سسی عالمده یاواشلانمادادیر گل

یئنه حسرتله "شفیق" اؤز قزلینده بئله سؤیلر

گل كی ائل شاعیرینین گؤزلری یاشلانمادادیر گل

كیتاب دا اویاق‌لاری (قافیه‌لری) آشاغیداكی كیمین یازیلیپ بللی دگیل سونو دور گل دیر یا دیر اكی‌دیر.

باشلانمادادور گل : باشلانمادادیر گل یا باشلانمادا دور گل

یاشلانمادادور گل: یاشلانمادادیر گل یا یاشلانمادا دور گل

...

من بیرینجی بیچیمی یازمیشام.

بتول مطیع نوع پرور (شفیق) – بیر آددیم گل یئتیشك

سنده آخیر عشق بازاریندا اویناتدین منی

بی وفالار مكتبیندن درس آلیب آتدین منی

 سنده آخیر وئرمه دین عشقه بها ای بی وفا

سنده آخیر چوخ اوجوز بیر قییمته ساتدین منی

 سن كی عشقیلن محبتدن دییه‌ردین هر زمان

پس نئجه اینصاف ائدیب بیر بئیله آغلاتدین منی 

سن دئمیشدین ائیله‌رم اثبات من عشقین گوجون

اما آخیر بیر سحر یالقوزلارا قاتدین منی 

سن كناریمدا اولاركن سانكی بیر دریا ایدیم

سن گئدیب بیر لحظه ده صحرایا اوخشاتدین منی

 سن گئده ندن بیلمیرم صوبحیله شامین فرقینی

تار ائدیب صوبحو گوزومده شامه آلّاتدین منی

 سن دییه‌ردین تا نفس وار پوزمارام پیمانیمی

سیندیریپ پیمانیوی بیر عؤمر آغلاتدین منی

 سن گئده‌ركن یازدی بیر شعریله اؤز دردین شفیق

گئتدین اما داغ هجرانیندا قایناتدین منی

بتول مطیع نوع پرور (شفیق) – بیر آددیم گل یئتیشك

mp3 اندیر

هاچانسا قاییدیب گله‌جگم من

بیر داها دانیشیب گوله‌‌جگم من

گؤزونون یاشینی سیله‌جگم من

حسرتله آغلاما، حسرتله باخما

گؤزونون یاشینی سیله‌جگم من

سئوگیلیم داریخما، گولوم داریخما!

گؤزلریم دولوپدور دیندیرمه منی

نیسگیللی سؤزلرله یاندیرما منی

قوروروم سینماییپ سیندیرما منی

اونسوز دا ییخیلمیش ائویمی ییخما

قوروروم سینماییپ، سیندیرما منی

سئوگیلیم داریخما، گولوم داریخما!

اوزاقدا اولسامدا یانیندایام من

فیكرینده روحوندا جانیندایام من

لاپ سنین قلبینده، قانیندایام من

اؤزونو اله آل، قلبینی سیخما

سئوگیلیم داریخما، گولوم داریخما

من آرزی ائدردیم كی ، جهان جننته دؤنسون

افسوس بوتون آرزیلاریم قالدی گؤزومده 

ایچدیمسه حیاتین شرابیندان

آغزیمدا زهرلی دادی قالدی

بیرچوخلاری كؤچدو بو جاهاندان

داشلاردا كیتابدا آدی قالدی

سیرین دییرك اؤلدوسه فرهاد

داغلاردا اونون فریادی قالدی

گؤگلومده یارین خاطیره‌سی باخ!

یالنیزلیغیمی آنلادی قالدی

سئل باسدی بوتون یوردلاری كندی

باخ آشناسی كؤچدو یادی قالد

نه قدر آغلاسان آغلا كی ،سنین آغلاییشین

بو قارانلیق گئجه ایچره اریییب محو اولاجاق

نه سنین‌چین ده، بو گؤیلرده قیزیل گون دوغاجاق...

گئجه‌نین قلبی قارا بیر داشا بنزر و گؤیون

پردئیئ ظولمتی آلتیندا اریر آه و فغان ...

سنین آنجاق او فغانین‌دی بو گؤیلومده قالان!

اومما یاردیم بو سمادان بو یاشیل چارداق‌دان

سنه بو اؤلكه‌ده قانون قارا بیر داخما وئریب

خانا ییلدیزلی ویاشیل آسما وئریب

نه قدر آغلاسان آغلا كی ،سنین آغلاییشین

بو قارانلیق گئجه‌نین قلبی ایچینده اریییر

كیمسه سۏرماز : بو قارانلیقدا بو سس ناله نه‌دیر؟

نه قدر قارا اولسا گونوموز

بو بئش گونلوك فیسا حیات شیرین‌دیر

قارانلیق‌سا گئجه، سحر ایشیق‌دیر

فیكیر وارسا ماوی دنیز انگین‌دیر1.

توركجه یازدیم شیرینلشدی سؤزلریم

گؤزلوك تاخدیم آیدینلاشدی گؤزلریم

گوندن گونه سولدو یازیق اورگیم

داغ یولوندا ایتدی آیاق ایزلریم.

حبیب ساهیر، یانان یاشیل، نشر افكار

****

1- گئنیش،اوجوبوجاغی گؤرونمه‏یه‌جك قدر گئنیش، دَرینلیك، یاییْقلیق (پهن، فراخ)

من قورخورام، سن قورخورسان،

او دا قورخور، بو دا قورخور،

بیز قورخوروق

تزه فیكیر بئینیمیزه گلن كیمی

تئز قورخوروق.

باشقاسین‌دان قورخدوغوموز بس دییلمیش،

اؤزوموزدن بیز قورخوروق!

قورخو، قورخو!

بیر قورد اولوب یئییر بیزی ایچیمیزدن،

نه گؤزلییر وطن بیزدن؟

ایراده یوخ،

كیشی‌لیك یوخ.

بیز قورخوروق،

بیز سوسوروق.

فیكیر اؤلور،

جان سوستالیر،

اورك دونوب،

روح بوغولور.

قورخو بیزیم دیلیمیزده كیلید اولور،

بئینیمیزده قیفیل اولور.

درد بودور كی، بو دردی ده

بیز قانیریق، بیز بیلیریك.

قورخا قورخا

اؤزوموز ده اؤزوموزچون

بیز قورخویا چئوریلیریك.

منیم سۏل الیمده یانیق یئری وار
او منه تؤحفه دیر كؤرپه‌لیگیمدن
اۏتون اۏتلوغوندان خبرسیز واختلار
الیمی مانقالدا یاندیرمیشام من
**
منه جیز دئدیلر
آنجاق قورخمادیم
الیمی یاندیریب تانیدیم اۏتو
منیم حیاتیله ایلك تانیشلیغیم
الیمی یاندیران اۏتدان باشلادی
**
اۏخشادی گؤزومو هله اوشاق‌كن
اوجاغین آل الوان آلاوی كؤزو
دونیایا گله‌لی، بیلمیرم ندن،
نییه وورولدوقسا یاندیریر بیزی
**
من اۏتدان قورخمادیم یانانا قدر
من قۏرخو بیلمه‌دیم قانانا قدر
ائله كی یاندیم
اۏتلا اویناماقدان قورخدوم دایاندیم
باشلاندی قورخو
باشلاندی احتیاط
باشلاندی حیات ...

ساچلاریما دن دوشور، دن دوشور، یامان دوشور

هر باخاندا آنامین، اۆرگینه قان دۆشور.

بو آغ ساچلار، آی انا، سنی درده سالماسین

ساچیمین آغلیغیندان قانین هئچ قارالماسین!

آلیشیرام گئجه‌‌لر ماسا آرخاسیندا من

ساچلاریمدا آغاریر قلبیمین آتشیندن

سن دئمه كی بالامین بلكه گیزلی قمی وار

واختسیز آغاران ساچیمین اؤزگه بیر عالمی وار

اؤلوم بئله قم دییل بو حیاتی دویانا

من بو آغ ساچلاریملا اؤعونورم، آی آنا

قارا، شوه ساچلاری طبیعت وئرمیش منه

من گۆونه‌بیلمرم اۏنون بو تؤعفه‌سینه

زحمتی حیاتیمین ایلك بزه‌گی سانمیشام

حسرت یاش اولوب، گؤزلره دولماقدادی، دای گل

گؤز یاشلاری آخماقدا، سئل اولماقدادی، دای گل

هجران تورو دونیانی قفس تك بورویوبدور

دونیا كیمی باغریم دا دارالماقدادی، دای گل

هجرینده كئچن لحظه لری یانقیلی ساز تك

قم پنجه‌سی، آه نغمه‌سی چالماقدادی، دای گل

سن‌سیزلیگه دؤزمك نه سایاق مۆمكۆن اولارمیش

دؤزدوم، دؤزوموم جانیمی آلماقدادی، دای گل

گل قوی گونشین بایداسی دونیایه جالانسین

باغریمدا قارانلیق ایزی قالماقدادی ، دای گل

سال داغلارا های، گؤیده بولوتلار دیله گلسین

یارپاق كیمی وارلیق بویو سولماقدادی، دای گل

یاتماز، یولونو گؤزلریم اولدوز كیمی گؤزله‌ر

گؤزلر كؤكو حسرتله سارالماقدادی، دای گل

هر گون سحر  آددیملاریوین ماهنیسین ایزله‌ر