یایقین بیر سورون اولان، اندیر، ائندیر یوخسا ایندیر!

بو سؤزجوك download قارشیلیغی دیر. بو سؤزجوك اؤزتورك (كؤك‌تورك) بیر سؤزجوك دیر آمما توركیه توركجه‌سینده دۆزلیپ سۏرا بیزیم توركجه‌یه گلیپ و قوللانماقدادیر. توركیه توركجه‌سینده اَنمك (ənmək) یئرینه اینمك (inmək) ائیلمی ایشلنیر و بو اۆزدن اندیرمك یئرینه ده ایندیرمك و بئله‌سی اندیر یئرینه ایندیر.

بونو آچیقلامالییام  انمك ائیلمی آذربایجان‌دا لهچه‌لرده دگیشیكلی تلففۆذلری واردیر اؤرنكچه :

انمك، یئنمك، ("ائنمك"ی من بیلمیرم!). بئله‌جه یا اندیر دوز دیر یا یئندیر و ایندیر دوز دییل!

حسرت یاش اولوب، گؤزلره دولماقدادی، دای گل

گؤز یاشلاری آخماقدا، سئل اولماقدادی، دای گل

هجران تورو دونیانی قفس تك بورویوبدور

دونیا كیمی باغریم دا دارالماقدادی، دای گل

هجرینده كئچن لحظه لری یانقیلی ساز تك

قم پنجه‌سی، آه نغمه‌سی چالماقدادی، دای گل

سن‌سیزلیگه دؤزمك نه سایاق مۆمكۆن اولارمیش

دؤزدوم، دؤزوموم جانیمی آلماقدادی، دای گل

گل قوی گونشین بایداسی دونیایه جالانسین

باغریمدا قارانلیق ایزی قالماقدادی ، دای گل

سال داغلارا های، گؤیده بولوتلار دیله گلسین

یارپاق كیمی وارلیق بویو سولماقدادی، دای گل

یاتماز، یولونو گؤزلریم اولدوز كیمی گؤزله‌ر

گؤزلر كؤكو حسرتله سارالماقدادی، دای گل

هر گون سحر  آددیملاریوین ماهنیسین ایزله‌ر

گؤزوم دوشدو تزه آیا

دئیم هلبت گله‌جكسن

قند الیمدن دوشدو چایا

دئدیم یقین گله‌جكسن

***

گینه دونیا كیمی باغریم دارالیب 
قولاغیم سسده، گؤزوم یولدا قالیب 
سیزلاییر ساز كیمی قمدن اوره‌گیم 
هانسی عاشیق اونو حسرتله چالیب ؟ 
كیم آچیب غم قاپیسین وارلیغیما ؟ 
نییه ایستك قاپیسی باغلی قالیب ؟ 
گینه حسرت، گینه آخشام، گینه غم 
گینه دویغو گولو كؤكدن سارالیب 
نه دیلك بازلیغی‌دیر چیلقین اورك ؟ 
من اوچون عرصه دونیا دارالیب 
یورما یار یار دئیه‌رك، یار اوره‌گین 
اودا اؤز ایسته‌گینه فیكره دالیب 
سحر اولسادم دا یالان وارلیغیما 
قارا بایراق گئجه لر كؤلگه سالیب 

***

***

سیغماییر ایستكلریم منطقلرین اركانینا

ایسته ییر عنوان اولوم دیوانه لر دیوانینا

سن آچان گوندن قاپانمیش یوللاری رؤیالره

مین دیلك ایلمكله‌نیر هر دم گؤیول دامانینا

هانسی یوللاردان گلیرسن گؤیده اولدوزلار گولور

چن دوشور حسرت قباسیندان باخیش میدانینا

سن دوننلر باغچاسیندا اكدیگیم بیر آرزوسان

گئج بئجردین دوشمه دی كؤلگه ن گؤروش ایوانینا

دامجی دامجی قان دامیركن ، قلبیمین پیمانه سی

دالغا – دالغا یوكسلیر میدان وئریر توفانینا

قوی اؤره‌ك دریای عشق اولسون، بوتون وارلیق گمی

قوی چئویرسین دالقالار دونیانی قان عمانینا

"سحر خانیم" دان

زامان دارېسقال‌دېر

                                    حیات اؤته‌ری

پارلاق گله‌جه‌گه تله‌سیره‌م من

اۏ قېزلې، اۏغلانلې، نوه‌لی چاغا

دانېشدېغېم دیلده یازېب پۏزماغا

بخته‌وه‌ر آنلارا، بخته‌وه‌ر گۆنه

دره‌یه، تپه‌یه، باغچایا، باغا

گۆلۆش‌لۆ اۆزلره، بۆلبۆل سسینه

روحومون ان گؤزل مرتبه‌سینه

پایېز یارپاغې تك زاغ-زاغ اسیره‌م

سئویملی صاباحا من تله‌سیره‌م

     صاباحا یۏل – فریبا ابراهیمی – انتشارات آزر سبلان

آند ایچیرم

دالغالی (دالقالی) گؤللرینه آند ایچیرم

دامغالی (دامقالی) اللرینه آند ایچیرم

*****

قویماریق باغلی قالا قوللاریمیز

قورویا گول - بوتامیز، خوللاریمیز

یئته دوستاق دیبینه یوللاریمیز

باغلانان قوللارینا آند ایچیرم

كسیلن یوللارینا آند ایچیرم

*****

قویماریق آل گونشین رنگی سولا

قورخولوق یوردوموزا كؤلگه سالا

چن توتا آرزو یولون، گؤز قارالا

آغاران تئللرینه آند ایچیرم

چن توتان بئللرینه آند ایچیرم

*****

قویماریق غم دنیزی دالغالانا

گتیره تولكو فئلی خلقی جانا

اودوموز اؤزگه اوجاغیندا یانا

سارالان گوللرینه آند ایچیرم

ساری بولبوللرینه آند ایچیرم

*****

یازاریق قوچ نبی‌نین شانلی سؤزون

چالاریق سازدا ائلین جانلی سؤزون

دویاریق خان آرازین قانلی سؤزون

سارالی سئللرینه آند ایچیرم

یارالی ائل لرینه آند ایچیرم

سحر خانیم 

زیتون اېشېغېندا، ودود دوستی (ایلقار)

دؤنگه‌میزده دوران اۏغلان

بېغلارېنې بوران اۏغلان

منه كیرپیك ووران اۏغلان

وئر منیم گۆللۆ باشماغېم

دابانې پوللو باشماغېم

***

دؤنگه‌نیزده دورمامېشام

بېغلارېمې بورمامېشام

سنه كیرپیك وورمامېشام

منده یۏخ گۆللۆ باشماغېن

دابانی پوللو باشماغېن

***

گۆل باخچادا بارېن اۏللام

شیرین هئیوا نارېن اۏللام

همیشه‌لیك یارېن اۏللام

گتیر منیم گۆل باشماغېم

ایچی دۏلو پول باشماغېم

***

گۆل باخچامدا بارېم اۏلسان

شیرین هئیوا نارېم اۏلسان

همیشه‌لیك یارېم اۏلسان

وئره‌رم سنین گۆل باشماغېن

ایچی دۏلو پول باشماغېن

***********

قایناق : آذربایجان آغېز ادبیاتی ، محمد اشراقی، تبریز 1388